La mort da la democrazia in Engiadina Bassa ! Domenic Toutsch

Fusiuns da cumüns procuran adüna darcheu per testas cotschnas. I da persunas chi sun per fusiuns e otras chi sun cunter talas, què es democrazia. Stut sun eu dal fat, cha n’ha pudü udir aint il radio, cha l’administradur da la PEB vegn miss indirectamaing in dumonda, d’üna part da la uschè nomnada elita politica da l’Engiadina Bassa, causa seis ingaschamaint cunter la fusiun da seis cumün natal, Sent. Ma chè ha’l fat quist malfatur d’ün adminstradur? Üna poesia, sün üna homepage cul nom «Sent forever» ! Scha quist es ün motiv per metter in dumonda la plazza d’ün administradur, eu l’es intunar, da tuot la populaziun da l’Engiadina Bassa, da Samignun fin sü Brail, dad aderents e adversaris da fusiuns, lura es bain bod fini cun nossa democrazia, in nossa bella Engiadina Bassa. Per mai sco simpel votant, quinta sia prestaziun sco administradur e na què cha’l fa in seis temp liber. Minchün in nossa Val sto avair il dret da dar part sia tenuta, saja què impiegats dal public, persunas singulas o eir da differents partits politics, voul dir drets o schnesters! Ingün nu po avair temma da na clappar plü incumbensas dal public o da perder sia plazza da lavur! Cun ün agir simel da las persunas a la testa da nossa regiun, nun es da dar da buonder, cha nus chatta plü persunas per caricas e plazzas publicas! Adonta cha nus vain divers chastels in Engiadina Bassa, il temp dals chastlans es definitiv passà! La metoda «bist Du nicht willig, so mache ich Dich hörig» nu maina inavant quista Val! Domenic Toutsch, Zernez, suppleant dal grondcussagl