Reducziuns da spertadad, mo per tgi? da Martin Sgier

La via principala da Glion a Tumein ha stedi dapli reducziuns da spertadad, quei ch`ei segir curdau si a mintga SursilvanA. E quei senza far endament ch`era atras Glion eis ei mo da semuentar plaunet, per buca survegnir posta.

Denton lein restar tier la via encunter Cuera ch`ei en posses dil cantun. Era ei pli baul in sviament d`in vitg, sco per exempel a Laax, sch`eis ei oz ina via che traversa in vitg, e las tablas 50km/h confirmeschan gie era quei, sut vi aunc las tablas pintgas, protecziun cunter canera. Mo da sperar ch`il Rein Anteriur hagi buca aunc da flessegiar pli plaun, per protecziun cunter canera.

Sco sch`ei fuss buca schon avunda cun tut quels velos cun agid dalla bescla da contact, aschia eis ei era aunc da tener endament sch`igl ei da carrar cun 80km/h 60 ni forsa mo 50, ach gie avon il tunnel da Trin eis ei aunc si ina tabla blaua da 50km/h. Ston ins esser blaus per ir atras quei tunnel? Viva la grischa.

Anavos tier la protecziun cunter canera, per ademplir las grevezzias da canera per in per habitonts, astga l`entira Surselva carrar pli ruasseivel. Aschia eis ei vegniu rispundiu en l`ura da damondas el cussegl grond, che quei seigi la schligiaziun, la pli modesta. Ei quei gest ? Exact, gest dapenda ei per tgi ? Las bialas e caras sanaziuns da vias cantunalas e quei senza protecziun cunter canera, entras reducziun da spertadad, dueigien vegnir dabien al traffic.

Engraziel a tutAs che prenden la via sin els per ir a luvrar e puspei turnar en Surselva, cun la speronza ch`ils autistAs hagein buca da deponer in temps il bigliet da carrar.

Bien viadi e carrai patgific !

Martin Sgier, Lumnezia (deputau PPS)