SVP Kanton Graubünden
Si a l’urna!
Dumengia elegia il suveran grischun la nova regenza per ils proxims quatter onns. Quella ha da schliar numerus grevs pensums e da dumagnar sfidas extraordinarias. I na va betg mo – dentant era – per puspè reparar la reputaziun dal Grischun donnegiada en l’entir pajais entras il scandal da cartels.
Noss chantun stat er avant enormas sfidas demograficas ed economicas, cunzunt ordaifer la Val dal Rain grischuna. Tar questa elecziun vai en emprima lingia per metter ensemen la meglra squadra pussaivla per quest pensum da Hercules. Sco ins dauda dentant da differentas vischnancas è la participaziun ordvart bassa, tge che n’exclauda betg resultats casuals. Ils eveniments enturn il scandal da cartel da bajegiar pon avair vilentà e frustrà blers electurs ed electuras e pon avair contribuì essenzialmain a la enfin uss bassa participaziun a l’elecziun. Da simplamain restar absent fiss gist uss ed envista ad in avegnir prosperand da noss chantun ina resposta sbagliada. Quest’emna han anc tuts votants da noss chantun la gronda schanza d’eleger ina regenza cumpetenta ed equilibrada. Tuttas partidas grondas e decisivas duain esser represchentadas en la regenza futura e collavurar a moda constructiva per dumagnar las sfidas dadas. Quai vul dir concret che tuttas partidas burgaisas duain esser represchentadas cun almain in represchentant en la regenza. Uschia han las forzas burgaisas ina maioritad solida che lubescha da schliar senza s’entardar ils problems da noss chantun. Per gliez fiss in cler mandat da la populaziun grischuna da gronda valur. Perquai, si a l’urna!
Heinz Brand, Claustra,
cusseglier naziunal e president da la pps
