SVP Kanton Graubünden
Roman Hug è il candidat da la PPS Grischun per il cussegl guvernativ
La partida cun las pli bleras electuras ed ils pli blers electurs en il Grischun fa valair ses dretg ad in sez en la Regenza. Suenter divers discurs cun eventuals candidats propona la direcziun da la partida unanimamain Roman Hug sco candidat sulet a la radunanza da nominaziun da la PPS Grischun. L’interprendider e president communal da Trimmis è la dretga persuna per gidar a concepir l’avegnir dal Grischun.
La direcziun da la partida ha grond plaschair da preschentar cun Roman Hug in candidat per la Regenza integher ed ordvart cumpetent cun experientscha da manar. Roman Hug è interprendider independent en il sectur d’architectura e dapi il 2016 president communal da Trimmis. Plinavant presidiescha el actualmain la partida dal Grischun cun las pli bleras electuras ed ils pli blers electurs e po guardar enavos sin duas periodas d’uffizi en il Cussegl grond.
Sia lavur d’interprendider e da politicher cumplettescha el cun posts en la suprastanza da l’Associaziun grischuna per il svilup dal territori (BVR) ed en l’uniun da promoturs da la FH Grischun a Cuira. En il militar è el maior dal stab da colliaziun territorial chantunal dal Grischun. Roman Hug ha pia gronda experientscha da manar en divers secturs.
Roman Hug è creschì si a Trimmis ed è in Grischun tras e tras. El enconuscha ils interess da la populaziun, pertge ch’il barat direct cun las abitantas ed ils abitants al stat a cor.
Sco finamira centrala numna Roman Hug il mantegniment da la libertad. Las tendenzas politicas dad oz considerescha el – en vista a las valurs liberalas – sco grond pass enavos. En la politica da corona actuala al manca en la regenza grischuna ina vusch che vul restrenscher las mesiras statalas al minimum absolut.
Per segirar il bainstar vul Roman Hug far tut il pussaivel per evitar surregulaziuns e procurar per structuras efficazias che fan daventar nossa regiun periferica attractiva per investiziuns. Il New Green Deal ch’è en consultaziun sin stgalim chantunal maina en quel connex cleramain en la fallada direcziun.
Areguard la segirtad disturban Roman Hug per il mument las relaziuns insupportablas en connex cun animals da rapina gronds. El è decididamain da l’opiniun che animals problematics ston vegnir regulads a moda nuncumplitgada.
La direcziun da la PPS Grischun è persvadida da proponer cun Roman Hug in candidat ordvart cumpetent per la regenza grischuna.
Cuors da vita da Roman Hug
Discuors a la conferenza da pressa da Roman Hug
